Levensloop
28 Mei 1956 waor ein sjoene zomerse daag.
De vogelkes flöte,de lui zaote oppe un terraske.
Oppe dee daag in ’t vere Dommelboarzedörp bin iech geböre, allewijl 55 jaor geleie.
De ierste twie jaor vaan mien leve hub iech,es einegs keend, in Oeteldonk gewoent,same met pap en mam.
Nao twie jaor zien veer nao ’t sjoene limburg verhuis,nao sjömmert.
Pap kös daor ’n gooi baon kriege bij de limmenaadfebrik.
Daor bin iech naor de liegere sjaol en de mavo gegaange en hub iech miene jäög doorgebrach.
Oppe mien zestiende stapte iech edere daag oppe miene fiets ’m ein wereldreis te beginne naor mestreech.
Daor oppe de Amalbergastraat hub iech oppe de MEAO gezete.
Nao veer jaor hel liere en veul fieste in mestreech had iech mien diploma gehaold en waor ’t gooie leve veurbijj.
Iech waor twinteg en ’t waor tied um te goon werreke.
De ierste sollicitatie dee iech deeg,waor inins raak.
Iech kös beginne es douanier.
In dee tied mochste es douanier neet in den eige provincie woene.
Dus ’t awwershoes verlaote en de wije wereld in getrokke.
Tot 1986 hub iech oppe veul plaotse gewoent,wie Amsterdam,Rotterdam ,Zevenaar,arnhem.
En daan hub iech noch e paar plaotse vergete.
Edere kier e paar jaor te kort um diech örgens thoes te veule.
In 1986 bin iech trök gekome en kös iech gaon werreke bijj de douaan in mestreech.
Daornaor bin iech de logistiek in gegange en hub iech gewerrek bijj ’t azm,nedcar en noe bijj Avnet in tongere,es warehouse operator.
Mien ierste kontakt mèt ’t heugemerveld waor in 1996.
Nao ’n neet geslaag houwelek ,koum iech oppe 12 januari 1996 in ’nne kaffee ’n ammesant meidske oet ’t Heugemerveld tege, Trudy Deckers.
’t Klikte metrein ,want iech geleuf nao ’n week later woende veer al same.
Oppe 30 oktober 1997 zien veer getröwd.
Iech had toen neet allein ’n vröw meh ouch metrein, zoonder er veul meujte veur hove te doon,twie zoons daobijj,Stefan en Nicky.
Daornao most iech wel aon de bak,want iech krieg noch ’nne zoon,Wesley en ’n dochter,Britt.
Iech woen dus al vaan 1996 in ’t Heugemerveld ,zestien jaor dus.
Veur mien doen ’nne lange tied.
En veur ’t iers veul iech mich ech thoes.
Iech zal neet mie gaw verhuize ,of ’t moot tösse zes plaank zien.
Oondaanks de väöle nuibouw en de dus väöl nui bewoeners in ’ Heugemerveld ,is ’t toch ’nne hechte gemeinsjap gebleve.
Iech zal altied ’nne boer blieve,meh es ze vraoge boe kums vaandan,
Dan zegk iech gruuts
Iech kom oet ’t Heugemerveld
Prins Willem den 1e